CONTENT WARNING

The contents of this blog and the language used herein are "mature" and suited only for non-idiot adults. Stay away if you do not wish to be offended. You've been warned !

Sep 18, 2008

ഒരു മൊല്ലാക്കയും പാഠപുസ്തക വിവാദവും !

പാഠപുസ്തക വിവാദത്തെ കുറിച്ച് പൂക്കോട്ടൂര്‍ നടത്തിയ പ്രസംഗത്തെ അപഗ്രഥിച്ച് എന്‍ ജെ ജോജു ഇട്ട പോസ്റ്റിനുള്ള കമന്റ് :



1. എ.കെ.ജിയെ കുട്ടികള്‍ക്കു പരിചയപ്പെടുത്തുന്നതില്‍‍ അസാംഗത്യമില്ല....പക്ഷേ സഖാവ് എ.കെ ഗോപാലനെ കുട്ടികള്‍ക്കു പരിചയപ്പെടൂത്തുന്നതിനു പിന്നില്‍ ദുരുദ്ദേശമുണ്ടെങ്കില്‍ അതു തെറ്റാണ്.

ഏ.കെ.ജിയെ പരിചയപ്പെടുത്തുന്നത് കമ്മ്യൂണിസം പ്രചരിപ്പിക്കലാണെങ്കില്‍ ഗാന്ധിയേയും നെഹൃവിനേയും പരിചയപ്പെടുത്തുന്നത് കോണ്‍ഗ്രസ്സിലേക്ക് ആളെക്കൂട്ടുന്ന പരിപാടിയാണെന്ന് തിരിച്ചും വാദിക്കാം.

പിന്നെ, എകെജിയെ കര്‍ഷക-തൊഴിലാളി സമരങ്ങളുടെ പരിപ്രേക്ഷ്യത്തിലല്ലാതെ പിന്നെ വേറെ എന്ത് അടിസ്ഥാനത്തിലാണാവോ പരിചയപ്പെടുത്തേണ്ടത് ?


2. "കമ്യൂണിസ്റ്റു ചരിത്രവുമായി ബന്ധപ്പെട്ട കരിവള്ളൂര്‍ സമരം"

ഇത് ആടിനെ പട്ടിയല്ല, പേപ്പട്ടിയാക്കുന്ന കളിയാണ്. കര്‍ഷകസമരമായ കരിവെള്ളൂര്‍ സംഭവത്തെ ആദ്യം കമ്മ്യൂണിസ്റ്റ് ചരിത്രവുമായി 'ബന്ധപ്പെട്ടത്' എന്ന് പറയുക. പിന്നെ അതു പാഠപുസ്തകത്തില്‍ ഇട്ടാല്‍ 'കമ്മ്യൂണിസം പ്രചരിപ്പിക്കലാണ്‍' എന്ന് വാദിക്കുക.

"ജന്മികുടിയാല്‍ പരിപ്രേഷ്യത്തിലാണ് സമരങ്ങളെ വിലയിരുത്തുന്നത്"

യേസ് യേസ്... റിമി ടോമീടെ ഗാനമേള നടന്നപ്പോള്‍ ഉണ്ടായ ലഹളയാണല്ലോ കരിവെള്ളൂര്‍ സമരം. അതുകൊണ്ട് അതിനെ 'ജന്മി-കുടിയാന്‍' പരിപ്രേക്ഷ്യത്തിലല്ല 'ഗാനമേള-കുടിയന്‍' പരിപ്രേക്ഷ്യത്തില്‍ വേണം അവതരിപ്പിക്കാന്‍ !

പൂക്കോട്ടൂര് തലയിലെ ആ തൊപ്പി അങ്ങ് ഊരിവച്ചിട്ട് ഇതൊന്ന് പഠിച്ചാല്‍ നന്നായിരിക്കും.

"അത്തരം ഉത്തരവുകളും ഗവര്‍മെന്റിന്റെ പ്രഖ്യാപനങ്ങളും ഉള്‍പ്പെടുത്തിക്കൊണ്ടാണ് പാഠപ്പുസ്തകം ക്രമീകരിച്ചീരിയ്ക്കുന്നത്."

ഷാജഹാന്‍ പെണ്ണുമ്പിള്ളയ്ക്ക് താജ്മഹലു പണിതതും അശോകചക്രവര്‍ത്തി ബുദ്ധധര്‍മ്മം പ്രചരിപ്പിക്കാന്‍ നാടൊട്ടുക്ക് സ്തംഭങ്ങള്‍ നാട്ടി തത്വങ്ങള്‍ കൊത്തിവച്ചതും മുഹമ്മദ് നബി മക്കത്തൂന്നു മദീനയ്ക്ക് ഓടിപ്പോയതും മദീനയ്ക്ക് പടയെടുത്തതും എല്ലാം പഠിപ്പിക്കാം; ജന്മി കുടിയാന്‍ ബന്ധം അവസാനിപ്പിക്കുന്നതും കുടിയൊഴിപ്പിക്കല്‍ നിരോധിക്കുന്നതുമായ സര്‍ക്കാര്‍ ഉത്തരവുകളും പ്രഖ്യാപനങ്ങളും പിള്ളാരു കണ്ടുപോകരുത് !

ഈ ലൈനില്‍ ചിന്തിക്കുന്ന കുറേ അണ്ണന്മാര് ഭരിക്കുമ്പോള്‍ തന്നല്ലേ അഫ്ഘാനില്‍ ബാമിയാനിലെ ബുദ്ധപ്രതിമകള്‍ ബോമ്പ് വച്ച് തകര്‍ത്തത് ?
ഹാവൂ ജനാധിപത്യം കൊണ്ടെനിക്കിരിക്കാന്‍ വയ്യേ !


3. "..ചെറുകാടിന്റെ നമ്മളൊന്ന് എന്നത് നൂറുശതമാനം കമ്യൂണിസ്റ്റു ചിന്താഗതിയുള്ള ഒരു നാടകമാണ്. ജന്മികുടിയാന്‍ പരിപ്രേഷ്യത്തിലുള്ള നാടകം..."

ജന്മി കുടിയാന്‍ പരിപ്രേക്ഷ്യമാണ് എറ്റവും വലിയ പ്രശ്നം !!

"അധികവായനയ്ക്ക് ഇതുമാത്രമേ സര്‍ക്കാരിനു നിര്‍ദ്ദേശിയ്ക്കാനുണ്ടായിരുന്നുള്ളൂ.?"

ഇത് കേട്ടാല്‍ തോന്നും ഒന്നു മുതല്‍ പത്തു വരെ ക്ലാസുകളിലെ സകല പാഠപുസ്തകങ്ങളും അരിച്ചു പറക്കീട്ട് പൂക്കോട്ടൂരിന് ചെറുകാടിന്റെ ഈ പുസ്തകം മാത്രമേ 'അധി'വായനയ്ക്ക് കിട്ടിയോളൂന്ന്.

4. കെ.ദാമോദരന്റെ പാട്ടബാക്കിയും ഒരു കമ്യൂണിസ്റ്റു നാടകമാണ്. നാടകത്തിന്റെ ഒന്നാം രംഗത്തില്‍ ബാ‍ലന്‍ എന്ന കുട്ടി അമ്മയോടു പറയുന്നവാചകം.... "ഈ ദൈവം ഇത്ര ദുഷ്ടനാണോ അമ്മേ?"
കേരളത്തിലെ ഗവര്‍മെന്റ് 12 വയസുള്ള കുട്ടിയ്ക്ക് അധികവായനയ്ക്ക് നിര്‍ദ്ദേശിച്ചിരിയ്ക്കുന്ന പുസ്തകത്തില്‍ മതനിഷേധം.


ഓഹോ ! ദുരിതം സഹിക്കാതെ ദൈവം ദുഷ്ടനാണോ എന്ന് ബാലന്‍ ചോദിക്കുന്നത് മതനിഷേധമാണോ ?

ശരി പൂക്കോട്ടൂരേ വേണ്ട, നമുക്ക് വേറെ ഒരു സാധനം പന്ത്രണ്ട് വയസ്സുകാരനെ പഠിപ്പിക്കാം :

* "എസ്രാ പ്രവാചകന്‍ ദൈവപുത്രനാണെന്ന് യഹൂദന്‍മാര്‍ പറഞ്ഞു. മിശിഹാ ദൈവപുത്രനാണെന്ന് ക്രിസ്ത്യാനികളും പറഞ്ഞു. അതവരുടെ വായ കൊണ്ടുള്ള വാക്ക് മാത്രമാണ്. മുമ്പ് അവിശ്വസിച്ചവരുടെ വാക്കിനെ അവര്‍ അനുകരിക്കുകയാകുന്നു. അല്ലാഹു അവരെ ശപിച്ചിരിക്കുന്നു"

* "അവരുടെ പണ്ഡിതന്‍മാരെയും പുരോഹിതന്‍മാരെയും മറിയത്തിന്റെ മകനായ മിശിഹായെയും അല്ലാഹുവിന് പുറമെ അവര്‍ രക്ഷിതാക്കളായി സ്വീകരിച്ചു. എന്നാല്‍ ഏകദൈവത്തെ ആരാധിക്കാന്‍ മാത്രമായിരുന്നു അവര്‍ കല്‍പിക്കപ്പെട്ടിരുന്നത്."

* "...നിങ്ങളുടെ രക്ഷിതാവില്‍ നിന്നും വല്ല നന്‍മയും നിങ്ങളുടെ മേല്‍ ഇറക്കപ്പെടുന്നത് വേദക്കാരിലും ബഹുദൈവാരാധകന്‍മാരിലും പെട്ട സത്യനിഷേധികള്‍ ഒട്ടും ഇഷ്ടപ്പെടുന്നില്ല..."

* "...സ്വര്‍ഗത്തില്‍ പ്രവേശിക്കണമെങ്കില്‍ യഹൂദരോ ക്രിസ്ത്യാനികളോ ആവാതെ പറ്റില്ലെന്നാണ് അവര്‍ പറയുന്നത്. അതൊക്കെ അവരുടെ വ്യാമോഹങ്ങളത്രെ. എന്നാല്‍ നബിയേ,പറയുക; നിങ്ങള്‍ സത്യവാന്‍മാരാണെങ്കില്‍ ( അതിന്ന് ) നിങ്ങള്‍ക്ക് കിട്ടിയ തെളിവ് കൊണ്ടു വരൂ എന്ന്..."

* " യഹൂദര്‍ക്കോ ക്രൈസ്തവര്‍ക്കോ ഒരിക്കലും നിന്നെപ്പറ്റി തൃപ്തിവരികയില്ല; നീ അവരുടെ മാര്‍ഗം പിന്‍പറ്റുന്നത് വരെ. പറയുക: അല്ലാഹുവിന്റെ മാര്‍ഗദര്‍ശനമാണ് യഥാര്‍ത്ഥ മാര്‍ഗദര്‍ശനം. നിനക്ക് അറിവ് വന്നുകിട്ടിയതിനു ശേഷം അവരുടെ തന്നിഷ്ടങ്ങളെയെങ്ങാനും നീ പിന്‍പറ്റിപ്പോയാല്‍ അല്ലാഹുവില്‍ നിന്ന് നിന്നെ രക്ഷിക്കുവാനോ സഹായിക്കുവാനോ ആരുമുണ്ടാവില്ല."

* "തീര്‍ച്ചയായും അല്ലാഹുവിങ്കല്‍ മതം എന്നാല്‍ ഇസ്ലാമാകുന്നു."

* "ഇസ്ലാം അല്ലാത്തതിനെ ആരെങ്കിലും മതമായി ആഗ്രഹിക്കുന്ന പക്ഷം അത് അവനില്‍ നിന്ന് ഒരിക്കലും സ്വീകരിക്കപ്പെടുന്നതല്ല. പരലോകത്തില്‍ അവന്‍ നഷ്ടക്കാരില്‍ പെട്ടവനുമായിരിക്കും."

* "അല്ലാഹു നിങ്ങളുടെ ശത്രുക്കളെപ്പറ്റി നന്നായി അറിയുന്നവനാകുന്നു...യഹൂദരില്‍ പെട്ടവരത്രെ ആ ശത്രുക്കള്‍. പക്ഷെ അല്ലാഹു അവരുടെ നിഷേധം കാരണമായി അവരെ ശപിച്ചിരിക്കുന്നു. അതിനാല്‍ അവര്‍ വിശ്വസിക്കുകയില്ല; ചുരുക്കത്തിലല്ലാതെ."

* "...മറിയമിന്റെ മകനായ ഈശോ മിശിഹാ അല്ലാഹുവിന്റെ ദൂതനും, മറിയമിലേക്ക് അവന്‍ ഇട്ടുകൊടുത്ത അവന്റെ വചനവും, അവങ്കല്‍ നിന്നുള്ള ഒരു ആത്മാവും മാത്രമാകുന്നു.
അത് കൊണ്ട് നിങ്ങള്‍ അല്ലാഹുവിലും അവന്റെ ദൂതന്‍മാരിലും വിശ്വസിക്കുക. 'ത്രിത്വം' എന്ന വാക്ക് നിങ്ങള്‍ പറയരുത്. നിങ്ങളുടെ നന്‍മയ്ക്കായി നിങ്ങള്‍ (ഇതില്‍ നിന്ന് ) വിരമിക്കുക. അല്ലാഹു ഏക ആരാധ്യന്‍ മാത്രമാകുന്നു. "

(വി.ഖുര്‍ ആന്‍ സൂറ 2, 3, 4,9 )


അയ്യയ്യോ... ഒരു കാര്യം മറന്നു. ഈ സാധനങ്ങളു തന്നല്ലേ തൊട്ടിലീന്ന് എണീക്കുന്ന പ്രായം മുതലു മദ്രസയിലും സണ്ടേ സ്കൂളിലും ശാഖയിലുമൊക്കെ പഠിപ്പിക്കുന്നത് ?

പൂക്കോട്ടൂരും പൗവ്വത്തില്‍ പിതാവും ബാക്കി ആത്മീയകുരുക്കന്മാരുമൊക്കെക്കൂടെ ആദ്യം ഇതൊക്കെയൊന്നു ചര്‍ച്ചിച്ച് ഒരു തീരുമാനത്തിലെത്ത്. എന്നിട്ട് പോരേ കമ്മൂണിസമാണോ പിണ്ണാക്കാണോ ഏഴാം തരത്തില്‍ പഠിപ്പിക്കേണ്ടത് എന്ന് ഗവേഷിക്കുന്നത് ?

ഇതൊക്കെയാണു വായിക്കുന്നതെങ്കില്‍ ബാലനല്ല അവന്റെ അമ്മപോലും ചോയിക്കും "ദൈവം ഇത്ര ദുഷ്ടനാണോ" എന്ന് !!


5. ഈ പാഠപ്പുസ്തകത്തിലൂടെ "കുട്ടി എത്തിച്ചേരേണ്ട പോയിന്റു"കളെ പറ്റി പൂക്കോട്ടൂര്‍ പറയുന്നത് നല്ല കോമഡിയാണ് :

"..1. കുടിയൊഴിപ്പിയ്ക്കലില്‍ നിന്ന് കേരളത്തിലെ ജനതയ്ക്ക് ആരാണു മോചനം നല്‍കിയത്? 2. കാര്‍ഷികാദായം എടുക്കുന്നതിനുള്ള സ്വാതന്ത്ര്യം കൊടുത്തതാരാണ്? 3. ഭൂമി വാങ്ങാ‍നും വില്‍കാനുമുള്ള അവകാശം നല്‍കിയത്?
അത് കേരളത്തിലെ കമ്യൂണിസ്റ്റു സമരങ്ങള്‍കൊണ്ട് ഉണ്ടായതാണെന്ന് എന്റെ കുട്ടിയെ പഠിപ്പിയ്ക്കുന്നു.
.."

ഒടുക്കം ബോട്ട് അവിടെക്കൊണ്ട് ചെന്നു കെട്ടി. ജന്മി-കുടിയാന്‍ സംഘര്‍ഷങ്ങള്‍ = കമ്മ്യൂണിസ്റ്റ് സമരം, കുടിയൊഴിപ്പിക്കലില്‍ നിന്ന് മോചിപ്പിച്ചത് = കമ്മ്യൂണിസ്റ്റുകാര്‍, ഭൂമിയുടെമേലുള്ള അവകാശം കൊടുത്തത് = കമ്മ്യൂണിസ്റ്റുകാര്‍ !!

മണ്ണിനെ പൊന്നാക്കല്‍ എന്ന ആ പാഠഭാഗത്ത് ഉള്ളത് :
പോക്കുവെയിലില്‍ നിന്ന് മാധവന്‍ നായരുടെ ജന്മിത്തത്തിന്റെ അലസ ജീവിതത്തെക്കുറിച്ച് ഒരു അനുസ്മരണം; ഏ.കെ.ജി യുടെ ആത്മകഥയിലെ ജന്മിത്തത്തിന്റെ ഭീകരതകളെ പറ്റിയൊരു പേജ്; കുടിയൊഴിപ്പിക്കലിന്റെ ഒരു വാങ്മയ ചിത്രം ; ക്ഷാമകാലത്ത് നെല്ല് കടത്തിക്കൊണ്ട് പോകുന്നതിനെതിരേ കരിവെള്ളൂരില്‍ കര്‍ഷകര്‍ സംഘടിച്ച് പോലീസുകാരെ എതിര്‍ത്തതും വെടിവയ്പ്പു നടന്നതിനേയും പറ്റി വിവരണം ഒക്കെയാണ്.

പാഠഭാഗത്തിനിടയ്ക്ക് ഇന്ററാക്ടീവ് പഠനരീതിക്കനുസൃതമായി 'ജന്മി-കുടിയാന്‍ അവസ്ഥകളെ'ക്കുറിച്ചും , ഇന്നത്തെ സാഹചര്യത്തിലുണ്ടായ മാറ്റങ്ങളെന്തൊക്കെയെന്നതിനെക്കുറിച്ചും, നിങ്ങളുടെ നാട്ടിലെ ജന്മിമാരെകുറിച്ച് അന്വേഷിക്കാനുമാണു എക്സര്‍സൈസുകള്‍ നിര്‍ദ്ദേശിച്ചിരിക്കുന്നത്.

ജന്മി കുടിയാന്‍ ബന്ധത്തെക്കുറിച്ച് നേരിട്ടോ അല്ലാതെയോ അറിയാവുന്ന ആളുകളുമായി അഭിമുഖം നടത്തിയും 'താഴെപ്പറയുന്ന പുസ്തകങ്ങളിലെ പ്രസക്തഭാഗങ്ങള്‍ വായിച്ചും' ജന്മിത്തകാലത്തെയും അക്കാലത്തെ കര്‍ഷകപ്രക്ഷോഭങ്ങളെയും കുറിച്ച് വിവരങ്ങള്‍ ശേഖരിക്കൂ എന്നാണു ശരിക്കും ആ എക്സര്‍സൈസ്. ദൈവത്തെ കൊല്ലണമെന്ന് എഴുതിയത് വായിക്കാനൊന്നും എവിടെയും പറയുന്നില്ല. കമ്മ്യൂണിസ്റ്റ് പാര്‍ട്ടീടെ ചരിത്രം പഠിക്കാനുമല്ല പറയുന്നത്.

6. ഞാന്‍ പറയുന്നു നിങ്ങള്‍ കുട്ടികളെ കോണ്‍ഗ്രസ് ചരിത്രവും കമ്യൂണിസ്സു ചരിത്രവും പഠിപ്പിയ്ക്കണ്ട. കേരളത്തിലെ സമരങ്ങളെ ജന്മി-കുടിയാല്‍ പരിപ്രേഷ്യത്തിലല്ലാതെ വിലയിരുത്തിയ എഴുത്തുകാരില്ലേ?

കര്‍ഷകര്‍ നടത്തിയ പ്രക്ഷോഭങ്ങളും നാടുവാഴിത്തത്തില്‍ നിന്ന് ജനാധിപത്യത്തിലേക്ക് ഭരണവ്യവസ്ഥ മാറിയപ്പോള്‍ അവര്‍ക്ക് ഭൂമിയിന്മേല്‍ അധികാരം പതിച്ചുകിട്ടാന്‍ കൊണ്ടുവരപ്പെട്ട സര്‍ക്കാര്‍ ആക്റ്റുകളും 'ജന്മി-കുടിയാന്‍' വ്യവസ്ഥയിലല്ലാതെ പിന്നെ എന്തിന്റെ പരിപ്രേക്ഷ്യത്തിലാണോ വിലയിരുത്തേണ്ടത്?

ബദര്‍ യുദ്ധത്തിന്റെ പശ്ചാത്തലത്തിലോ ?
കോണ്‍സ്റ്റന്റൈന്റെ വാളിനോട് ചേര്‍ത്തുവച്ചോ ?
മഹാഭാരതയുദ്ധം വച്ചോ ?

കര്‍ഷകസമരങ്ങളും മണിപ്രവാളപ്രസ്ഥാനവും എന്നൊരു പുസ്തകം ഉടന്‍ ഇറങ്ങും. പൂക്കോട്ടൂരിനു ആ 'പരിപ്രേക്ഷ്യം' മതിയാവുമോ എന്തോ !!

7. "ഒന്നാമതായി ഈ പുസ്തകം കമ്യൂണിസം പഠിപ്പിയ്ക്കുന്നു. കമ്യൂണിസം പഠിപ്പിയ്ക്കുന്നു എന്നതിനേക്കാള്‍ ഗൌരവകരമായത് മതനിരാസം പഠിപ്പിയ്ക്കുന്നു എന്നതാണ്. ദൈവത്തെ കൊല്ലണമെന്നു പറയുന്ന കുട്ടി, ദൈവമില്ലെന്നു പഠിപ്പിയ്ക്കുന്ന സിദ്ധാന്തം.

കരിവെള്ളൂര്‍ എന്ന സ്ഥലത്ത് റിമി ടോമി നടത്തിയ ഗാനമേളയില്‍ കുടിച്ച് ബോധമില്ലാതെ ചിലര്‍ പ്രശ്നമുണ്ടാക്കി. അതിനെ ജന്മി കുടിയന്‍ പ്രശ്നം എന്ന് പറയുന്നു....ഏഴാം ക്ലാസിലെ സാമൂഹ്യപാഠത്തില്‍ വിവാദമായത് 'ദൈവത്തെ എങ്ങനെ കൊല്ലാം' എന്ന പാഠഭാഗമാണ്. ആ ഭാഗം എഴുതിയത് ചെറുകാട് എന്നൊരു കമ്മ്യൂണിസ്റ്റുകാരനാണ്....

.... അഞ്ജനമെന്നതെനിക്കറിയാം മഞ്ഞളു പോലെ വെളുത്തിരിക്കും...!

8. "പൊതു കിണറ്റില്‍ നിന്നും വെള്ളമെടുത്ത ദളിതനെ ചുട്ടുകൊന്നു.".... ഒരു പന്ത്രണ്ടു വയസുകാരനെ പലമതക്കാരും ജാതിക്കാരും ഒന്നിച്ചിരിയ്ക്കുന്ന ഒരു ക്ലാസ് മുറിയില്‍ ഈ പാഠഭാഗം പഠിപ്പിയ്ക്കുന്നതില്‍ അസാംഗത്യമില്ലേ? ഇത്രമാത്രം ഭീകരമായ ഒരു സംഭവം കൊച്ചുകുട്ടിയുടെ മനസിലേയ്ക്ക് പകര്‍ന്നു കൊടുക്കണോ? സംഭവിച്ചതാണെന്നു പറഞ്ഞിട്ട് കാര്യമുണ്ടോ? ഒരു സവര്‍ണ്ണനും ദളിതനും ഒന്നിച്ചിരിയ്ക്കുന്നക്ലാസില്‍ ഇതു പഠിപ്പിയ്ക്കുമ്പോള്‍ അവര്‍ക്കുണ്ടാകുന്ന വികാരമെന്തായിരിയ്ക്കും? എന്താണ് ഇതു പഠിപ്പിയ്ക്കുന്നതിന്റെ ലക്ഷ്യം? ഇതു പഠിപ്പിയ്ക്കുന്നതിന്റെ ലക്ഷ്യം ഇതിനു കാരണം മതമാണ് എന്നു സ്ഥാപിയ്ക്കുന്നതിനാണ്."

അതേ തീര്‍ച്ചയായും ഇത്രമാത്രം ഭീകരമായതൊന്നും കുട്ടികളെ പറഞ്ഞ് പേടിപ്പിക്കരുത്. നമുക്ക് കുറച്ചുകൂടി നല്ല സാധനങ്ങളില്ലേ... ഉദാഹരണത്തിനു ദാ ഇത് :

"...തീര്‍ച്ചയായും നമ്മുടെ തെളിവുകള്‍ നിഷേധിച്ചവരെ നാം നരകത്തിലിട്ട് കരിക്കുന്നതാണ്. അവരുടെ തൊലികള്‍ വെന്തുപോകുമ്പോഴെല്ലാം അവര്‍ക്ക് നാം വേറെ തൊലികള്‍ മാറ്റികൊടുക്കുന്നതാണ്. അവര്‍ ശിക്ഷ ആസ്വദിച്ചു കൊണ്ടിരിക്കാന്‍ വേണ്ടിയാണത്. തീര്‍ച്ചയായും അല്ലാഹു പ്രതാപവാനും യുക്തിമാനുമാകുന്നു..
...നരകാഗ്നി അവരുടെ മുഖങ്ങള്‍ കരിച്ചു കളയും. അവരുടെ ചുണ്ടുകള്‍ മാറുകയും പല്ലിളിച്ചവരാവുകയും (ചെയ്യും). ( ഖുര്‍ ആന്‍ 4:56, 23:104)
"

മാംസം കരിയുന്നതിന്റെ, തൊലി പൊള്ളുന്നതിന്റെ, മുഖം തീയില്പ്പെടുമ്പോള്‍ ചുണ്ടുകള്‍ വെന്ത് പല്ല് ഇളിക്കുന്നതിന്റെ ഒക്കെ 'സാന്ത്വന' ചിന്തകള്‍ വേണം നമുക്ക് കുട്ടികളില്‍ നിറയ്ക്കാന്‍.

9. ...പുസ്തകത്തില്‍ കുട്ടിയോട് ചോദിയ്ക്കുന്ന ചോദ്യങ്ങള്‍.
പട്ടികയില്‍ നിന്ന് എന്തൊക്കെ മനസിലാക്കാന്‍ കഴിയുന്നു?
വിദ്യാലയത്തില്‍ പഠിച്ചിരുന്നവരില്‍ കൂടുതല്‍ ഏതു ജാതിക്കാരായിരുന്നു?
ജാതിയിലും മതത്തിലും പിടിച്ചുകൊണ്ടൂള്ള ഒരു ചര്‍ച്ച. എന്നിട്ട് കുട്ടി തന്റെ കണ്ടെത്തല്‍ അവതരിപ്പിയ്ക്കണം. ഇതെല്ലാം വച്ചുകൊണ്ട് കുട്ടി ഒരു പോയിന്റില്‍ എത്തിച്ചേരണം. അതിനു വേണ്ടിയാണ് അടുത്തഭാഗങ്ങള്‍.....


ദളിത് പീഡനത്തിന്റെ വാര്‍ത്തയ്ക്ക് താഴെ ഇന്ററാക്ടീവ് പഠനാഭ്യാസമായി കൊടുത്തിരിക്കുന്നത് ഇങ്ങനെയാണു:

*മുകളില്‍ കൊടുത്ത പ്രതിജ്ഞ ചൊല്ലി ('ഇന്ത്യയെന്റെ രാജ്യമാണ്') വളര്‍ന്ന നമ്മുടെ സമൂഹത്തിലെ ചിലര്‍ ഇത്തരത്തില്‍ പെരുമാരുന്നതെന്താണു ?
*ഏതെങ്കിലും തരത്തില്‍ തൊട്ടുകൂടായ്മ ഇന്നും നിലനില്‍ക്കുന്നുണ്ടോ ?

പൂക്കോട്ടൂര്‍ ഇതില്‍ നിന്നു തന്നെ പാഠത്തിന്റെ ഫോക്കസ് നിശ്ചയിക്കുന്നു - മതനിരാസമാണതെന്ന് !

ജാതിതിരിച്ചുള്ള സ്കൂള്‍ പട്ടികയില്‍ അല്പം അരോചകത്വമുണ്ട് എന്ന് സമ്മതിക്കുന്നു. എന്നാല്‍ അതിനു താഴെയുള്ള ക്ലാസ് ചര്‍ച്ച എക്സര്‍സൈസ് നോക്കുക:
*ഭൂരിപക്ഷം പേരും ചെറിയ ക്ലാസില്‍ പഠനം നിര്‍ത്താന്‍ എന്താവും കാരണം ?
*വിദ്യാലയത്തില്‍ പഠിച്ചിരുന്നവരില്‍ കൂടുതലും ഏത് ജാതിയില്‍ പെട്ടവരായിരുന്നു ?
*ജാതീയ വിവേചനത്തിന്റെ പേരില്‍ ഇന്നും കുട്ടികള്‍ സ്കൂളില്‍ പഠിക്കാതിരിക്കുന്നുണ്ടോ ?

അടുത്ത വിഷയത്തിന്റെ ആമുഖം : "ജാതിമതവ്യത്യാസമില്ലാതെ വിദ്യാലയങ്ങളില്‍ പഠിക്കുവാനുള്ള അവസരം ഇന്ന് നമ്മുടെ നാട്ടിലുണ്ട്. ഈ പുരോഗതി വിദ്യാഭ്യാസരംഗത്ത് മാത്രമല്ല മറ്റ് മേഖലകളിലും ഉണ്ടായിട്ടുണ്ട്. എന്നാല്‍ പണ്ടത്തെ അവസ്ഥ അതായിരുന്നില്ല..."

തുടര്‍ന്ന് ചര്‍ച്ച ജാതീയ ഉച്ചനീചത്വങ്ങള്‍ കേരളത്തില്‍ എങ്ങനെയായിരുന്നുവെന്ന് നോക്കുന്നു. ദേവകി നിലയങ്ങോടിന്റെ ഒരു ജാതീയവിവേചനവിവരണം ആണ് അടുത്തത്. ("എച്ചില്‍").

പാഠത്തിന്റെ ഫോക്കസ് കൃത്യമായി നിര്‍വചിക്കുന്ന ഒരു എക്സര്‍സൈസ് :

* നിങ്ങളുടെ നട്ടില്‍ ഇത്തരം അനാചാരങ്ങളുണ്ടായിരുന്നോ ? പ്രായമുള്ളവരോട് ചോദിച്ചറിയാം.

അത് കഴിഞ്ഞ് ഈ അവസ്ഥകളെ മാറ്റി മറിക്കാന്‍ നടന്ന ലഹളകളുടെയും പ്രക്ഷോഭങ്ങളുടെയും കഥയാണു - ചാന്നാര്‍ ലഹള, വൈക്കം സത്യാഗ്രഹം, ഗുരുവായൂര്‍ സത്യാഗ്രഹം തുടങ്ങി വക്കം മൗലവിയുടെ മുസ്ലീം ഐക്യസംഘവും ഇസ്ലാമിക അനാചാരങ്ങളെ മാറ്റാനുള്ള ശ്രമവും വരെ സംക്ഷിപ്തമായി വിവരിക്കുന്നു.


ഇതിലെവിടെയാണു സര്‍ "മതമാണ് എല്ലാ പ്രശ്നത്തിനും കാരണം" എന്ന ആശയം ?

10. .. ഹരിജന്‍ സ്ത്രീകള്‍ക്ക് മാറുമറയ്ക്കാന്‍ അവകാശം കിട്ടിയത് സ്വാതന്ത്ര്യമാണെങ്കില്‍ എന്റെ സഹോദരിയ്ക്ക് മുഖം മറയാനുള്ളതും സ്വാതന്ത്ര്യമാണ്. ആ സ്വാതന്ത്ര്യം എന്തുകൊണ്ട് വകവച്ചുകൊടുത്തുകൂടാ‍?...

മുഖം മറയ്ക്കാനുള്ള സ്വാതന്ത്ര്യം ! പോലും ....
പര്‍ദ്ദയുടെ ആയത്ത് ഖുര്‍ ആനില്‍ വന്നത് എങ്ങനെയാണെന്ന് പൂക്കോട്ടൂരിന് അറിയാത്തതൊന്നുമല്ലല്ലോ ?

"..നബിയേ, നിന്റെ പത്നിമാരോടും പുത്രിമാരോടും വിശ്വാസികളുടെ സ്ത്രീകളോടും അവര്‍ തങ്ങളുടെ മൂടുപടങ്ങള്‍ തങ്ങളുടെമേല്‍ താഴ്ത്തിയിടാന്‍ പറയുക: അവര്‍ തിരിച്ചറിയപ്പെടുവാനും, അങ്ങനെ അവര്‍ ശല്യം ചെയ്യപ്പെടാതിരിക്കുവാനും അതാണ് ഏറ്റവും അനുയോജ്യമായത്." (ഖുര്‍ ആന്‍ 33:59)

വസ്ത്രത്തില്‍ 'വിശ്വാസതീവ്രത' കാണിക്കുന്നതിനെപ്പറ്റി ചര്‍ച്ച ചെയ്താല്‍ സകല പൂച്ചകളും ചാക്കിനു പുറത്താവുമെന്ന് പൂക്കോട്ടൂരിനറിയാം. അപ്പോള്‍ സ്വാതന്ത്ര്യമാണെന്ന് നിങ്ങള്‍ ആവര്‍ത്തിക്കുന്ന ബുര്‍ഖയും ഹിജാബ് പരിപാടിയും ചോദ്യം ചെയ്യപ്പെടും...നിങ്ങളുടെ ഹിപ്പോക്രിസി അഴിഞ്ഞു വീഴും... ഇദ്ദാണാശാനേ ക്രിട്ടിക്കല്‍ പെഡഗോപി (!)

11. ... ഏഴാം ക്ലാസിലെ കുട്ടിയുടെ മുന്നില്‍ ഒരു മിശ്രവിവാഹം അവതരിപ്പിയ്ക്കപ്പെടുന്നു. രണ്ടാമത് സ്കൂളില്‍ ചേരുന്ന കുട്ടിയ്ക്ക് മതം വേണ്ട. വിദ്യ്യാര്‍ത്ഥിയുടെ മുന്നില്‍ മതനിരാസം അവതരിപ്പിയ്ക്കപ്പെടുന്നു...

വീണ്ടും ആട് = പട്ടി = പേപ്പട്ടി തിയറി !

സ്കൂളില്‍ ചേരുന്ന കുട്ടിക്ക് മതം വേണ്ട എന്നല്ലല്ലോ, മതമില്ലാതെയും ജീവിക്കാം/ മതമില്ലാതെയും സ്കൂളില്‍ ചേര്‍ക്കാം എന്നല്ലേ ? മതമില്ലാത്ത അവസ്ഥ ഒരു option മാത്രമായി അവതരിപ്പിക്കുമ്പോള്‍ ഇത്ര കണ്ട് ക്ഷോഭിക്കാന്‍ എന്തിരിക്കുന്നു മാഷേ ?

ക്രിസ്തുമതവും യഹൂദമതവും ഹൈന്ദവമതവും ഇസ്ലാമും വേറെ വേറേ വിദ്യാര്‍ത്ഥിക്ക് ചുറ്റുമുള്ള സമൂഹത്തില്‍ ഉണ്ട്. അതൊക്കെ ചരിത്രമായോ വേദപാഠമായോ കുട്ടി പഠിക്കുകയും ചെയ്യുന്നു. മതം ഇല്ലാതെയും മനുഷ്യനു സമൂഹത്തില്‍ ജീവിക്കാം - അങ്ങനെ ജീവിക്കുന്നുണ്ട് - എന്ന് പറഞ്ഞാല്‍ അത് മതനിരാസം ആവുന്നതെങ്ങനെ ? അങ്ങനെയെങ്കില്‍ ഫിസിക്സും ബയോളജിയുമൊന്നും പഠിപ്പിക്കാനേ പറ്റില്ലല്ലോ അണ്ണാ!

12. "അന്‍‌വര്‍ റഷീദിന് ലക്ഷ്മീദേവിയെ വിവാഹം കഴിയ്ക്കണമെന്നു തോന്നിയത് എപ്പോഴാണ്? പ്രായപൂര്‍ത്തിയായപ്പോള്‍ വിവാഹം കഴിയ്ക്കണമെന്നു തോന്നിയപ്പോള്‍ ഇസ്ലാം മതത്തെക്കാള്‍ നല്ലത് ലക്ഷ്മീദേവിയാണെന്ന് അന്‍‌‌വര്‍ റഷീദിനും ഹിന്ദുമതത്തേക്കാള്‍ നല്ലത് അന്‍‌‌വര്‍ റഷീദാണെന്ന് ലക്ഷ്മീദേവിയ്ക്കും തോന്നിയപ്പോള്‍..."

ബലേ ഭേഷ് !!

ഇപ്പോഴാണ് പൂച്ച ശരിക്കും പുറത്ത് ചാടുന്നത്. അത് പൂച്ചയല്ല എന്ന് മാത്രമല്ല നല്ല ഒന്നാന്തരം വര്‍ഗ്ഗീയ വിഷപ്പാമ്പാണു താനും !

റഷീദ് ലക്ഷ്മിയെ വിവാഹം ചെയ്യണമെങ്കില്‍ ഇസ്ലാം ഉപേക്ഷിക്കണം! ലക്ഷ്മിക്ക് റഷീദിനെ വിവാഹം ചെയ്യണമെങ്കില്‍ ഹിന്ദു മതവും !! അതായത് ഒരിക്കലും സഹകരിക്കാനാവാത്ത - ഇനി സഹകരിച്ചാല്‍ തന്നെ - വളരെ ദൂരെ മാറ്റിനിര്‍ത്തുന്ന - ആശയങ്ങളാണ് മതം കുട്ടിയുടെമേല്‍ ഇളം പ്രായത്തില്‍ തന്നെ അടിച്ചുറപ്പിക്കുന്നത് എന്ന് ഭംഗ്യന്തരേണ പൂക്കോട്ടൂര്‍ മൊല്ലാക്ക പറയുകയാണ്.

റഷീദിനെ സംബന്ധിച്ചിടത്തോളം ലക്ഷ്മീദേവി നരകത്തില്‍ പോകേണ്ടവളാകണം. ലക്ഷ്മീദേവിക്ക് റഷീദും നരകത്തില്‍ പതിയ്ക്കുന്നവനായിരിക്കും (അല്ലെങ്കില്‍ അനന്തമായ ജനനമരണ ചക്രത്തിലുഴലേണ്ടവന്‍)...
രാജീവ് ഗാന്ധിയെ സംബന്ധിച്ചിടത്തോളം സോണിയ നരകത്തിലും സോണിയയെ സംബന്ധിച്ചിടത്തോളം രാജീവ് നരകത്തിലും...!

അങ്ങനെയേ ആകാവൂ. അതിനപ്പുറം അടുത്താല്‍ 'കാഫിര്‍ ' !! കണ്‍ഗ്രാചുലേയ്ഷന്‍സ് മിസ്റ്റര്‍ പൂക്കോട്ടൂര്‍ .

ഈ വാചകം ഇക്കാലത്തും അങ്ങനെ തന്നെ ബ്ലോഗിലിടാന്‍ കാണിച്ച തൊലിക്കട്ടിക്ക് ജോജുവിനും ഒരു നമിപ്പ്!

13. പക്ഷേ ചെറുപ്പത്തില്‍ കുട്ടികളെ തങ്ങളുടെ വിശ്വാസത്തില്‍ വളര്‍ത്താന്‍ മാതാപിതാക്കള്‍ക്ക് അവകാശമുണ്ട് കടമയുണ്ട്.

അത്ര നിര്‍ബന്ധമുള്ളവര്‍ ഒരു കോഴിക്കൂട്ടിലിട്ട് പിള്ളാരെ വളര്‍ത്തുന്നതാവും നല്ലത്. കാരണം വെളിയിലിറങ്ങിയാല്‍ അവന്‍ പര്‍ദ്ദ കാണും, കുങ്കുമ പൊട്ട് കാണും, കുരിശ് കാണും . ഇതെല്ലാം എന്തോന്നാ എന്ന് അന്വേഷിച്ച് നിങ്ങളെ ശല്യപ്പെടുത്തുകയും ചെയ്യും.

14. മതം എന്നാല്‍ പ്രശ്നമാണെന്നു പഠിച്ചുകഴിഞ്ഞ കുട്ടി, മതമീല്ലാതെ ജീവിയ്ക്കാം എന്നു കണ്ട കുട്ടി 'ഇതൊന്നും എന്നെ ബാധിയ്കില്ല' എന്നു വായിക്കുമ്പോള്‍ ലേഖകന്റെ ഉദ്ദ്യേശം എന്താണ്......
... ഇതുകൊണ്ടു കുട്ടി എവിടെ എത്തിച്ചേരണം ? മനുഷ്യന്റെ അടിസ്ഥാനപ്രശ്നങ്ങള്‍ക്കൊന്നും മതം ഒരു പരിഹാരമല്ല എന്ന പോയിന്റിലേയ്ക്ക് കുട്ടിയെ കൊണ്ടൂചെന്ന് എത്തിയ്ക്കണം...



ഇതാണു ശരിക്കും ആടിനെ പേപ്പട്ടിയാക്കല്‍ :

പാഠഭാഗത്തെ എക്സര്‍സൈസ് :

വിവിധമതങ്ങളില്‍ വിശ്വസിക്കുന്നവര്‍ തമ്മിലുള്ള കലഹങ്ങളും ഒരേ മതത്തില്പ്പെട്ട വിഭാഗങ്ങള്‍ തമ്മിലുള്ള കലഹങ്ങളും ഇല്ലാതാക്കാന്‍ നമുക്കെന്ത് ചെയ്യാന്‍ കഴിയും ?

*അന്ധവിശ്വാസങ്ങളേയും അനാചാരങ്ങളേയും ഒഴിവാക്കുക.
*സ്വന്തം വിശ്വാസത്തെപ്പോലെ തന്നെ മറ്റുള്ളവരുടെ വിശ്വാസത്തേയും ആദരിക്കുക.
* .................
* .................


(ബാക്കി വിദ്യാര്‍ത്ഥിക്ക് എക്സര്‍സൈസ് ആയി പൂരിപ്പിക്കാന്‍ വിടുകയാണ്‍)

പൂക്കോട്ടൂര്‍ പറഞ്ഞ "താഴെപ്പറയുന്നവ കൂടുതല്‍ ആരെ ബാധിക്കും?" എന്ന എക്സര്‍സൈസിനു താഴെ വേറെ ഒരെണ്ണം കിടക്കുന്നത് അദ്ദേഹം കണ്ടില്ലയോ; അതോ കണ്ടില്ലെന്ന് നടിച്ചതോ ?
ദാ ഇതാണത് :

നന്മയുടെ നാളുകള്‍ എന്ന ഉപശീര്‍ഷകത്തില്‍

ദൂരെദിക്കില്‍ നടന്ന വര്‍ഗ്ഗീയ കലാപത്തെത്തുടര്‍ന്ന് ഒരുപാടാളുകള്‍ വീടും നാടും വിട്ട് പലായനം ചെയ്യുന്നു. അതിലൊരു കുട്ടി നിങ്ങളുടെ വീട്ടിലും അഭയം തേടുന്നു. ഒപ്പം താമസിച്ചു തുടങ്ങുമ്പോഴാണു അവന്റെ മതവിശ്വാസങ്ങളും ആചാരങ്ങളും തികച്ചും വ്യത്യസ്ഥമാണെന്ന് മനസ്സിലാവുന്നത്. ഇത്തരമൊരു സന്ദര്‍ഭത്തില്‍ എന്തായിരിക്കും നിങ്ങളുടെ പ്രതികരണം. ഒരു കുറിപ്പ് തയാറാക്കുക.

മുകളില് പൂക്കോട്ടൂര്‍ മാമന്റെ കിത്താബീന്ന് ഉദ്ധരിച്ച വാചകങ്ങള് അക്ഷരാര്‍ത്ഥത്തില് തന്നെ വിഴുങ്ങുന്നവനാണെങ്കില്‍ ചെറുക്കനെ ആ സെക്കന്റില്‍ വീട്ടീന്ന് അടിച്ച് വെളിയിലിറക്കും എന്നായിരിക്കും ഉത്തരമെഴുതുക ! ഏതായാലും അത്ര വെളിവ് കെട്ടവന്മാര്‍ കേരളത്തില്‍ - പ്രത്യേകിച്ച് ഏഴാം ക്ലാസില്‍ - ഉണ്ടാവില്ല എന്നാശിക്കാം.

പിന്നെ, മനുഷ്യന്റെ അടിസ്ഥാനപ്രശ്നങ്ങള്‍ക്കൊന്നും മതം ഒരു പരിഹാരമല്ല എന്ന് ലേഖകന്‍ പ്രത്യേകിച്ച് 'ദുരുദ്ദേശ'ത്തോടെ ഒന്നും ഏഴാം ക്ലാസുകാരനു പറഞ്ഞു കൊടുക്കേണ്ടതില്ല.

ഭൂകമ്പവും പകര്‍ച്ചവ്യാധിയും വെള്ളപ്പൊക്കവുമൊന്നും ഏതെങ്കിലും പ്രത്യേകമതത്തെയല്ലല്ലോ ബാധിക്കുക.

ഭൂകമ്പം, പകര്‍ച്ചവ്യാധി, വെള്ളപ്പൊക്കം, വിശപ്പ്, തൊഴിലില്ലായ്മ, ദാരിദ്ര്യം എന്നിവയ്ക്ക് പൂക്കോട്ടൂരും പൗവ്വത്തില്‍ പിതാവുമൊക്കെ പോയിരുന്നു പ്രാര്‍ത്ഥിക്കുമായിരിക്കും. ഏഴാം ക്ലാസുകാരനു അത്രയ്ക്ക് 'ബുദ്ധിവികാസം' എതായാലും ഇല്ല. സുനാമി വന്നപ്പോള്‍ വള്ളിക്കാവിലെ അമൃതാനന്ദമയി ആശ്രമക്കാരും വേളാങ്കണ്ണീലെ പള്ളിക്കാരുമൊന്നും ആ സമയത്ത് 'മതത്തെ മനുഷ്യന്റെ അടിസ്ഥാനപ്രശ്നങ്ങള്‍ക്ക് പരിഹാരമായി ' കണ്ടില്ലല്ലോ .... അതെന്താണോ എന്തോ ...!! :))


15. ...ഇന്ത്യാമഹാരാജ്യത്തുനടന്നിട്ടൂള്ള ഏതെങ്കിലും വര്‍ഗ്ഗൂ‍യകലാപത്തില്‍ മതം പങ്കുവഹിച്ചിട്ടൂണ്ടോ? ഗുജറാത്ത് കലാപത്തിന്റെ മുന്‍പില്‍ പോലും ഒരു സ്വാമിയൂണ്ടോ ഒരു അച്ചനുണ്ടോ ഒരു മതപണ്ഡിതനുണ്ടോ? മതമല്ല വര്‍ഗ്ഗീയതയ്ക്കു കാരണം...

മതത്തിലെ വൈകൃതമാണു ആ പാഠം മുഴുവന്‍ എന്ന് വിചാരിച്ചുറപ്പിച്ചവര്‍ക്ക് ഇങ്ങനെയേ പുലമ്പാനാവൂ. മതമാണു വര്‍ഗ്ഗീയതയ്ക്കോ ജാതിക്കോ കാരണമെന്ന് ആ പാഠം എവിടെയാണൂ സാറേ പറയുന്നത് ?

ചാന്നാര്‍ ലഹള നടത്തിയത് ഏതെങ്കിലും യുക്തിവാദിയാണോ ?
വൈക്കം സത്യാഗ്രഹം നടത്തിയത് ഹിന്ദുമതത്തിനെതിരേയാണോ ?
ഗുരുവായൂര്‍ സത്യഗ്രഹം നടന്നത് ഗുരുവായൂരപ്പനെതിരെയാണോ ?
വക്കം അബ്ദുള്‍ഖാദര്‍ മൗലവി മതനിരാസ പ്രചാരകനായിരുന്നോ ?
പ്രത്യക്ഷ രക്ഷാ ദൈവസഭ ക്രിസ്തുവിനെതിരേ തുടങ്ങിയ വല്ല ക്ലബ്ബും ആണോ ?


ചോദിച്ചിട്ട് കാര്യമില്ല. റഷീദ് ലക്ഷ്മിയെ വിവാഹം ചെയ്തത് ഇസ്ലാമിനേക്കാള്‍ 'നല്ലത്' ലക്ഷ്മീദേവിയാണെന്ന് തോന്നിയതുകൊണ്ടാണ് എന്ന് വായിച്ചെടുത്ത കിഴങ്ങന്‍ തലച്ചോറിനു അത് മനസ്സിലായില്ലാന്ന് വരും !!


16. അതിനു ശേഷം ഒരു നബിവചനം കൊടുത്തിരിയ്കുന്നു. അങ്ങനെയൊരു നബിവചനം ആ ഘടനയില്‍ ഉള്ളതായി എനിക്കറിയില്ല. എന്നാല്‍ ആരാണിതു തയ്യാറാക്കിയാതെന്നു ചോദിയ്ക്കാന്‍ പറ്റുമോ?

ഓ..യേസ് യേസ്... ശരിക്ക് പറഞ്ഞാല്‍ ദാ താഴെ കിടക്കുന്ന സാധനമായിരുന്നു പാഠപുസ്തകത്തില്‍ അടിച്ചു വയ്ക്കേണ്ടിയിരുന്നത് . പൂക്കോട്ടൂര്‍ മൊല്ലാക്കയ്ക്ക് അപ്പോള്‍ സമാധാനമായേനെ.

* "സത്യവിശ്വാസികളേ, ബഹുദൈവവിശ്വാസികള്‍ അശുദ്ധര്‍ തന്നെയാകുന്നു. അതിനാല്‍ അവര്‍ ഈ കൊല്ലത്തിന് ശേഷം മസ്ജിദുല്‍ ഹറാമിനെ സമീപിക്കരുത്...
* അല്ലാഹുവിലും അന്ത്യദിനത്തിലും വിശ്വസിക്കാതിരിക്കുകയും, അല്ലാഹുവും അവന്റെ ദൂതനും നിഷിദ്ധമാക്കിയത് നിഷിദ്ധമായി ഗണിക്കാതിരിക്കുകയും, സത്യമതത്തെ മതമായി സ്വീകരിക്കാതിരിക്കുകയും ചെയ്യുന്നവരോട് നിങ്ങള്‍ യുദ്ധം ചെയ്ത് കൊള്ളുക. അവര്‍ കീഴടങ്ങിക്കൊണ്ട് കയ്യോടെ നികുതി കൊടുക്കുന്നത് വരെ
." (വി.ഖുര്‍ ആന്‍ 9: 28, 29)

23 comments:

  1. സൂരജ്,
    ഞാന്‍ അവിടെ ഇട്ട കമന്റിതാണ്.
    “സൂരജെ,
    ഞാന്‍ പൊട്ടിച്ചിരി‍ക്കുന്നതില്‍ വിരോധമില്ലല്ലോ?

    ഇവിടെയൊക്കെ ടൈപ്പു ചെയ്തു സമയം കളയാന്‍ സൂരജും നില്‍ക്കാറുണ്ടോ?

    ആ നേരം വേറെ എന്തെല്ല പണിചയ്യാം.


    ബ്ലോഗ്ഗുകള്‍ വായിക്കാന്‍ തുടങ്ങിയ കാലം മുതല്‍ ശ്രദ്ധിക്കുന്ന ഒരു വിഷയമാണ് ഈ മാര്‍ത്തോണ്‍ ചര്‍ച്ചകള്‍. പലപ്പോഴും സമയംകൊല്ലികള്‍ മാത്ര മായി മാറുകയാണിവയെല്ലാം.

    നിഷ്പക്ഷമതിയായ ഒരാള്‍ ഒരു പ്രശ്നം വിശകലനം ചെയാന്‍വേണ്ടി ചര്‍ച്ച തുടങ്ങിയാല്‍ ഒരു പക്ഷെ അതു അഞ്ചോ ആറോ കമന്റുകളീല്‍ ഒതുങ്ങും. ഈ പോസ്റ്റിനാധാരമായ കുറിപ്പ് ഒരു പ്രത്യേക ലക്ഷ്യത്തോടെ ഇടുന്നതാണ്. ചൂണ്ടയില്‍ ഇര കൊരുക്കുന്നപോലെ, പലരും കൊത്തും , പക്ഷെ അതു ചൂണ്ടയാണെന്നു മനസ്സിലായി ഇട്ടേച്ചും പോകും. ഒരാള്‍ പറയുന്ന കമന്റ് വള്ളി പുള്ളി വിടാതെ , വാചകങ്ങളോരോന്നായി ഉദ്ധരിച്ചു മറുപടികള്‍ !! നല്ല തമാശ തന്നെ.

    ഇത്ര ക്ഷമ ആളുകള്‍ക്കെങ്ങിനെ കിട്ടുന്നു എന്ന് ഞാന്‍ അത്ഭുതപ്പെടാറുണ്ട്. സെസും കേരളവികസനവും ഇതു വരെ തീര്‍ന്നിട്ടില്ല, മര്‍ഡോക്കും ഏഷ്യാനെറ്റും ജൈത്രയാത്ര തുടരുന്നു. ഇപ്പോഴിതാ മൊല്ലയുടെ വിശകലനവും.

    എല്ലാമുസ്ലീങ്ങളും തീവ്രവാദികളാണോ എന്നു ഒരു പോസ്റ്റ് ,ചോദ്യം മുന്നോട്ടു വച്ചിരിക്കുന്നു. ഇതേചോദ്യം സ്ഥിരമായി ബ്ലോഗ്ഗില്‍ വരാറുള്ളതാണ്. പക്ഷെ മറ്റുള്ളിടങ്ങളില്‍ ഇല്ലാതിരുന്ന തിരക്കും ചര്‍ച്ചയും നമുക്കിവിടെ കാണാനാകും.

    മനസ്സില്‍ തോന്നിയതു വെറുതേ പറഞ്ഞന്നേ ഉള്ളൂ. ഇതൊക്കെ ഒരു തമാശ എന്ന രൂപത്തില്‍ ആസ്വദിക്കുകയാണ് ഞാന്‍.

    ReplyDelete
  2. അനില്‍ ജീ,

    സംഗതി കോമഡിയെന്നു വച്ചാല്‍ സിനിമാലയേക്കാള്‍ കോമഡി. പിന്നെ എന്തിനാ പോയി കമന്റുന്നേ ചോദിച്ചാ ആവോ !

    ചില സാധനങ്ങള്‍ കാണുമ്പോള്‍ കൈ തരിക്കും...ഒരു രസം അത്രേ ഉള്ളൂ.

    ചര്‍ച്ചിക്കാനൊന്നുമല്ല കമന്റിട്ടത്. മൊല്ലാക്കയുടെ വാദങ്ങളെ അതിന്റെ മറ്റേ എക്സ്ട്രീമില്‍ നോക്കിയാല്‍ കാണുന്ന കാഴ്ചകള്‍ ഒന്ന് സങ്കല്പിച്ചെന്നേയുള്ളൂ.

    ReplyDelete
  3. അതു കലക്കി!

    താങ്കളെ സമ്മതിക്കണം സൂരജ്‌! എങ്ങനെ കിട്ടുന്നു ഇത്രയും ക്ഷമ?

    പിന്നെ മറ്റേ പൂക്കോട്ടൂര്‍ പോസ്റ്റിന്റെ കാര്യം. സൂരജിനറിയാമെന്ന് എനിക്കുറപ്പാണ്‌, എങ്കിലും ഒന്നു പറഞ്ഞോട്ടെ - മച്ചാന്‍ വര്‍ഗ്ഗീസ്‌ ചെന്ന് മൈക്‌ ടൈസന്റെ ചന്തിക്കു തോണ്ടുന്ന് മച്ചാന്‍ വര്‍ഗ്ഗീസിന്‌ ഗുണത്തിനാണ്‌. ടൈസനൊന്നു തോണ്ടിയാല്‍ ഈ ജീവി ചത്തുപോകും, പോരാത്തറ്റിന്‌ നാണക്കേട്‌ വേറെയും. ഇനി അഥവാ ടൈസന്‍ പ്രതികരിച്ചാല്‍ "ഞാനും ടൈസനുമൊന്നു കോര്‍ത്തു" എന്നു വീരവാദമടിക്കാം. ഇനി ഒന്നും ചെയ്യാതിരുന്നാല്‍ "ടൈസനുപോലും എന്നെ പേടിയാണ്‌, കണ്ടില്ലേ ഞാനയാളെ തോണ്ടിയിട്ടുപോലും പ്രതികരിക്കാനയാള്‍ക്ക്‌ ധൈര്യമില്ലെ"ന്നു പറയുകയുമാവാം!

    ReplyDelete
  4. സൂരജേ,
    കമന്റ് ക്ഷ, പിടിച്ചു എന്നു പറയേണ്ടതില്ലല്ലോ...

    അനില്‍, ചന്ത്രക്കാരന്‍ എന്നിവരുടെ അഭിപ്രായത്തോട് ഒരു പ്രതികരണം...
    പ്രശ്നങ്ങളെ വ്യക്തിപരമായിട്ടല്ല സമീപിക്കേണ്ടത് എന്നു തോന്നുന്നു.

    പാഠപുസ്തകത്തില്‍ മതനിരാസം ഉണ്ടെന്നു വാദിക്കുന്നവരെ പ്രതിവാദം നിരത്തി, അതില്ലെന്ന് ബോധ്യപ്പെടുത്താനാവില്ല.

    കാരണം ഒരു പ്രത്യേക രാഷ്ട്രീയ ലക്ഷ്യത്തില്‍ നിന്ന് ഉടലെടുത്തതാണ് ആ വാദങ്ങള്‍. അത് തിരിച്ചറിയുന്നവര്‍ക്ക് നിങ്ങള്‍ ചൂണ്ടിക്കാട്ടിയതു പോലെ രണ്ടു വഴികള്‍ സ്വീകരിക്കാം.

    ഒന്ന് അവഗണിക്കുക, രണ്ട് ഇടപെടുക.

    അനിലിന്റെ പറഞ്ഞതുപോലെ വാചകങ്ങള്‍ക്കും വാക്യങ്ങള്‍ക്കും പ്രത്യേകം പ്രത്യേകം മറുപടി പറയുന്നതിന് (എനിക്കെങ്കിലും) ഒരു കാരണമുണ്ട്. മിക്കപ്പോഴും അതിന്റെ മറുവശം മറ്റു വായനക്കാരുമായി പങ്കിടുക എന്ന ലക്ഷ്യം.

    പ്രത്യക്ഷത്തില്‍ ശരിയെന്നു തോന്നുന്ന ചില വാദങ്ങള്‍ അപകടകരമായ ചിന്തയെ അറിഞ്ഞോ അറിയാതെയോ പേറുന്നുണ്ടെങ്കില്‍, ശക്തമായി ഇടപെടേണ്ടതുണ്ട്.

    കമന്റെഴുതി ജയിക്കുകയോ, തോല്‍പ്പിക്കുകയോ ഒരു ലക്ഷ്യമല്ല. ശക്തമായ മറുവാദങ്ങള്‍ ഉയരുമ്പോള്‍, സംവാദത്തിനു മൂര്‍ച്ചയേറും. ഇത്തരം സംവാദങ്ങളിലൂടെ കൊണ്ടും കൊടുത്തും വളരുന്നത് നല്ലതല്ലേ..

    കാര്യങ്ങള്‍ അറിഞ്ഞാല്‍ മാത്രം പോര, അത് പറയേണ്ടിടത്ത് കൃത്യമായി ഓര്‍മ്മ വരികയും ചെയ്യണമെങ്കില്‍ ഇത്തരം സംവാദങ്ങള്‍ ഒരു ശീലമാക്കുന്നത് നന്നെന്നാണ് വ്യക്തിപരമായ അഭിപ്രായം.

    ബ്ലോഗുടമയോ ഗൂഗിളോ നീക്കം ചെയ്യാത്ത കാലത്തോളം നാമീ എഴുതിക്കൂട്ടുന്നത് സൈബര്‍ സ്പെയിസില്‍ ഉണ്ടാകുമെന്ന് ഉറപ്പല്ലേ. അപ്പോള്‍ പ്രതിവാദങ്ങള്‍ക്ക് പ്രസക്തിയുണ്ട്.

    മതമൗലികവാദത്തിന്റെ അസ്തിവാരത്തില്‍ നിന്ന് കെട്ടിപ്പൊക്കിയതാണ് പാഠപുസ്തകത്തിലെ മതനിരാസത്തെക്കുറിച്ച് ഉയരുന്ന വിവാദങ്ങള്‍. സഖാവ് ഏകെജിയെ പരിചയപ്പെടുത്തുന്നതില്‍ ദുരുദ്ദേശമുണ്ട് എന്ന് ഒരു മൗലവി എത്ര ആധികാരികമായാണ് പറയുന്നത്.

    ആരാണ് ദുരുദ്ദേശം തീരുമാനിക്കുന്നത്? മൗലവിയും ആരാധകരും കാണുന്ന ദുരുദ്ദേശം പൊതുസമൂഹം തൊണ്ട തൊടാതെ വിഴുങ്ങണമെന്ന ശാഠ്യത്തില്‍ ഫാസിസത്തിന്റെ വിഷപ്പത്തിയുണ്ട്. വേറെത്രയോ പുസ്തകങ്ങളുണ്ട്, ചെറുകാടിന്റെ പുസ്തകം എന്തിന് അധിക വായനയ്ക്ക് നിര്‍ദ്ദേശിച്ചു എന്നാണ് വേറൊരു എമണ്ടന്‍ ചോദ്യം...

    ഏതു പുസ്തകം വായിക്കാന്‍ പറഞ്ഞാലും നമുക്ക് ഈ ചോദ്യം ചോദിക്കാം. അപ്പോള്‍ വീണ്ടും ഒരു ചോദ്യം ഉയരും. ഏഴാം ക്ലാസുകാരന്‍ ഏത് പുസ്തകം വായിക്കണമെന്ന് മൗലവിയാണോ തീരുമാനിക്കുന്നത്? മതപുരോഹിതരാണോ കുട്ടികളുടെ വായനയുടെ അജണ്ട നിശ്ചയിക്കുന്നത്..? അവര്‍ നിര്‍ദ്ദേശിക്കുന്ന ഏതെങ്കിലും പുസ്തകം കൂട്ടിച്ചേര്‍ക്കാനല്ല ഈ കൂത്തും കൂടിയാട്ടവും.

    മറിച്ച് ഈ പുസ്തകം എന്തിന് വായിക്കാന്‍ പ്രേരിപ്പിച്ചു എന്നാണ് ചോദ്യം. അത് കമ്മ്യൂണിസം വളര്‍ത്താനാണെന്ന സ്വന്തം സിദ്ധാന്തം തെളിയിക്കാന്‍ ആദ്യമേ അവതരിപ്പിച്ച അനുമാനമാണ് ഈ ചോദ്യം. കുട്ടികള്‍ക്കും രക്ഷാകര്‍ത്താക്കളുമില്ലാത്ത ഉല്‍ക്കണ്ഠയും വേവലാതിയും കുട്ടികളില്ലാത്ത, രക്ഷാകര്‍ത്താക്കളല്ലാത്ത പുരോഹിതന്മാര്‍ക്കാണല്ലോ...

    പാഠപുസ്തക വിവാദവുമായി ബന്ധപ്പെട്ട് നടക്കുന്ന ചര്‍ച്ചകളില്‍ ഇടപെടുന്നത് ഇങ്ങനെ ചില ചിന്തകളുടെ പുറത്താണ്.

    ReplyDelete
  5. വായിച്ചു
    ഇഷ്ടപ്പെട്ടു

    ReplyDelete
  6. ഒന്നു ആര്‍ത്തു ചിരിച്ചിട്ടു പൊക്കോളാം സൂരജെ..:)))))))


    പണ്ട് സീതിഹാജി ഇന്ദിരാഗാന്ധിയെ കാണാന്‍ പോയപ്പോള്‍ ഇന്ദിരാഗാന്ധി സീതിഹാജിയോടു ചോദിച്ചു പോലും

    ആര്‍ യു സീതി ഹാജി..?

    സീതി ഹാജിയുടെ ഉത്തരം.

    കൊള്ളാം അറിയോന്നൊ, ജ്ജ് നമ്മളെ പ്രധാനമന്ത്രിയല്ലെ..!


    ഇതാണ് പൂക്കോട്ടുരും ടീമും..!

    ഓഫ്: ഇമ്മാതിരി കൂതറടീമുകള്‍ക് മറുപടി കൊടുക്കാനാണ് ഈ ബ്ലോഗെങ്കില്‍ ഇങ്ങോട്ടുള്ള വരവ് നിര്‍ത്തി..;)

    ReplyDelete
  7. നിങ്ങളിങ്ങനെ നിറം നോക്കി
    കെട്ടിപ്പിടിച്ച്‌, പള്ളക്കടിച്ച്‌, വാവിട്ടു കരഞ്ഞോ
    അല്ലെങ്കില്‍ പരസ്‌പരം ചുമലില്‍ കയറ്റി
    പൊട്ടിച്ചിരിച്ചോ.
    ബഹു രസമാവുന്നു ഈ "ദേശാഭിമാന സര്‍ക്കസു" കാണാന്‍.

    ഇതേതാണപ്പോ രാജ്യം
    പഴയ കണ്ണൂരു നാടോ പഴയ സോവിയറ്റ്‌ റഷ്യയോ
    പിന്നേം പഴയ ചൈനീസ്‌ നാടോ ?

    (യ്യോ ദളിതന്റെ പേരിലുള്ള കണ്ണീര്‌ കണ്ടില്ലെ,
    പരമ ദയാലുവേ ഇവരെ രക്ഷീച്ചീടണേ...)

    ReplyDelete
  8. “...നരകാഗ്നി അവരുടെ മുഖങ്ങള്‍ കരിച്ചു കളയും. അവരുടെ ചുണ്ടുകള്‍ മാറുകയും പല്ലിളിച്ചവരാവുകയും (ചെയ്യും). ( ഖുര്‍ ആന്‍ 4:56, 23:104)”

    നരകത്തിലെത്തുന്ന പല്ലില്ലാത്ത വയസ്സന്മാര്‍ എന്തുകാട്ടി ഇളിക്കും മാളോരേ?

    ദാണ്ടെ കെടക്കണു ചുണ്ടുകള്‍ മാറിയതും, ഒറിജിനല്‍ പല്ലൊള്ളതും, വെപ്പുപല്ലൊള്ളതും, ഒറ്റപ്പല്ലുപോലും ഇല്ലാത്തതുമായ കൊറേ ഫ്രം നരകം ഇമ്പോര്‍ട്ടഡ് സൂപ്പര്‍ സ്മൈലികള്‍! (പതിനാലെണ്ണം ഒണ്ടു്!)
    :) :) :) :) :) :) :) :) :) :) :) :) :) :)

    ReplyDelete
  9. കലക്കി.പക്ഷെ ഇതിനൊക്കെ മറുപടിയെഴുതാന്‍ താങ്കള്‍ ഇത്ര സമയം പഴാക്കണോ?

    ReplyDelete
  10. സൂരജേ തകര്‍ത്തു..

    എനിക്കൊരു കുഞ്ഞു സംശയം .. സൂരജ് അത്യാവശ്യം തിരക്കൊക്കെ ഉള്ള ആളല്ലേ??
    എന്നിട്ടും ഈ സാധനമൊക്കെ പോയി വായിക്കണോ.. - - they are just spreading negative energy and stupid ideas!!

    എന്നിട്ടിതൊക്കെ ഇവിടെ/അവിടെ പറഞ്ഞിട്ടെന്താ കാര്യം ..
    ഇവിടെ വന്നു വായിക്കുന്നവര്‍ ഒരുവിധമൊക്കെ ഇതെല്ലാം അറിയുന്നവര്‍ / മനസ്സിലാക്കിയവര്‍ ആണ്. അവിടെ വായിക്കുന്നവരുടെ കാര്യം ​എനിക്കറിയില്ല.

    എത്രയോ നല ബ്ളോഗുകളുണ്ട്.. - spreading good ideas / positive energy etc.. [eg. Babuchettan]

    Sandeep.

    PS: സത്യം പറഞ്ഞാല്‍ എന്റെ ബ്ളോഗ്‌ ഒരു നിര്‍ഗുണബ്ളോഗാണു ... ആശയങ്ങള്‍ക്കോ ജ്ഞാന/വിജ്ഞാനത്തിനോ വായിക്കാനാണെങ്കില്‍ ഒരു ഗുണവും ഇല്ലാത്ത ഒന്നു. ചുമ്മാ ടൈം പാസ് അത്രന്നെ. [Just personal stuff..]

    Well.. once again I appreciate the effort anyway! :)

    ReplyDelete
  11. സൂരജേ.. ഭംഗിയായി. (ഹാറ്റ്സ് ഓഫ് എന്നൊന്നും പറയാന്‍ പാടില്ലലോ ..അത ചിലപ്പോള്‍ ചിലര്‍ക്ക് ഇഷ്ടമാവില്ല)..

    ജോജുവിന്റെ പോസ്റ്റ് വായിച്ച് കമന്റ് ഇടാതെ പോന്നതാണ്. അനില്‍ പറഞ്ഞപോലെ ഇത്തരം ലേഖനങ്ങള്‍ക്ക് മറുപടി എഴുതാന്‍ ഇപ്പോള്‍ തോന്നാറില്ല.ഇപ്പോള്‍ ഇനി ഇതില്‍ കൂടുതല്‍ എന്ത് എഴുതാന്‍...

    ReplyDelete
  12. ഉരുളക്ക് ഉപ്പേരി പോലുള്ള ഉത്തരങ്ങള്‍.
    ഗംഭീരം.

    ReplyDelete
  13. തൊപ്പി ഊരുന്നു...

    പാവം മൊല്ലാക്കയുടെ പ്രസംഗത്തിന്റെ ഡെഡ് ബോഡി കെടക്കണ കെടപ്പ് കണ്ടിട്ട് കരച്ചില്‍ വരുന്നു....

    അനില്‍, ചന്ദ്രക്കാരന്‍, മാരീചന്‍ ഇവരുടെ ഒക്കെ കമന്റുകള്‍ കൂടുതല്‍ ചര്‍ച്ച ആവശ്യപ്പെടുന്നു. ഇത്തരം പൂക്കോട്ടൂര്‍ ടൈപ്പ് കലാപരിപാടികളെ അവഗണിക്കണോ കിട്ടുന്ന സ്ഥലത്ത് ഇട്ട് പെടക്കണോ?

    പെടക്കലിന്റെ ഭാഗത്തേക്ക് ചായാനാണ് ഇപ്പോള്‍ എനിക്ക് തോന്നുന്നത്.

    ReplyDelete
  14. പെടയ്ക്കണം മൂര്‍ത്തീ. അതു് അവര്‍ക്കു പ്രശസ്തി കൊടുക്കും എന്നതു പ്രശ്നമല്ല. കുപ്രസിദ്ധിയാണല്ലോ കൊടുക്കുന്നതു്.

    ഇതിനു ചെലവാക്കുന്ന ഊര്‍ജ്ജം വ്യര്‍ത്ഥമല്ലെന്നാണു് എന്റെ അഭിപ്രായം.

    ReplyDelete
  15. കലക്കി സൂരജ്.

    ഏഴാം ക്ലാസിലെ കുട്ടിയെ എന്ത് പഠിപ്പിക്കാം,ഏത് പുസ്തകം വായിപ്പിക്കാം എന്നൊക്കെ എത്ര മനശാസ്ത്ര പരമായും,ശിശു സൌഹൃദപരവുമായാണ് ഈ വായിട്ടലക്കുന്നവര്‍ നേതൃത്വം നല്‍കുന്നവരുടെ മത പാഠശാലകളില്‍ തയ്യാറാക്കിയിരിക്കുന്നത് എന്നു നോക്കുന്നത് രസകരമായിരിക്കും...............

    ഇതിനു കുറച്ച് മുബ് സ്കൂളില്‍ ഒന്‍പതാം ക്ലാസിലെ കുട്ടികള്‍ക്ക് ലൈംഗിക വിദ്യാഭ്യാസം നല്‍കുന്നതിനെതിരെ ഇങ്കിലാബ് ഉണ്ടാക്കിയിരുന്നു ഇവര്‍.അഞ്ചാം ക്ലാസിലെ കുട്ടിയെ ലൈംഗിക ബന്ധത്തിനു മുബു ചെല്ലുന്ന പ്രാര്‍ത്ഥന വരെ പഠിപ്പിക്കാം ഇവര്‍ക്ക് മദ്രസാ പാഠപുസ്തകത്തില്‍. പക്ഷേങ്കില് സ്കൂളില് പാടില്ല...ഞങ്ങള് അതിന് സമ്മതിക്കൂലാ..ഇത് സത്യം..സത്യം..സത്യം.

    ReplyDelete
  16. പ്രിയ മൂര്‍ത്തി,

    ഓഫ് ടൊപിക്കാണ്.

    എന്റെ കാഴ്ചപ്പാടുകള്‍ക്കു പുതുമുഖത്തിന്റെ പോരായമകള്‍ ഉണ്ടാവുമെന്ന് തിരിച്ചറിയുമല്ലോ.
    സംഘടനാ രംഗത്തു പ്രവര്‍ത്തിക്കുന്ന ഒരു ശീലത്തിന്റെ ഭാഗമായാണ് ഒരു പക്ഷെ ഈ കാഴചപ്പാട്,ചര്‍ച്ചകളെ സംബന്ധിച്ചു, വന്നതെന്നു തോന്നുകയാണ്. അവിടെ ഒരു കാര്യം റിപ്പോറ്ട്ട് ചെയ്താല്‍ നമ്മുടെ ഊഴത്തില്‍, കഴിയുന്നത്ര കാര്യങ്ങള്‍ ചര്‍ച്ചയില്‍ പങ്കെടുത്തു പറയാം, പ്രാധാന്യമര്‍ഹിക്കുന്നതാണെങ്കില്‍ മറുപടി കിട്ടും, അല്ലെങ്കില്‍ അവഗണിക്കപ്പെടും. വീണ്ടും നമുക്കതിന്റ്റെ പുറകെ പറയാന്‍ അവസരം കിട്ടില്ല, ഈ ഒരു ശീലം ഇവിടേയും പറഞ്ഞന്നേയുള്ളൂ.ഇനി പുതിയ ശീലം ഉള്‍ക്കൊള്ളാം.

    താങ്കളുടെ പ്രൊഫൈലിലെ ഏറ്റവും ഇഷ്ടപ്പെട്ട ഉദ്ധരണി ഇതാണ്,ഞാനുമതിഷ്ടപ്പെട്ടു

    ഇഷ്ടപ്പെട്ട ഉദ്ധരണി: വിഡ്ഡികളുമായി തര്‍ക്കിക്കരുത്. ചുറ്റുമുള്ളവര്‍ക്ക് തിരിച്ചറിയാന്‍ ബുദ്ധിമുട്ടായിരിക്കും.


    ഇനി ടോപ്പിക്.

    അവിടെ വീണ്ടും അങ്കം തുടങ്ങിയിരിക്കുന്നു. അപ്പോള്‍ പടവാളെടുക്ക തന്നെ വേണം.

    ReplyDelete
  17. കൊമ്മി സര്‍ക്കാരിനിട്ട് പണിയാനാണെങ്കിലും മുക്രിയും സംഘപ്രിവാരത്തോഴരും കാതൊലിക്കാ വക്താക്കളും ഒരുകുടക്കീഴില്‍ വന്നിരിക്കുന്നു. ഭാരതാംബേ വിജയിപ്പൂതാക !!

    ReplyDelete
  18. പ്രിയ സൂരജ്

    ഖുർ ആനിലെ പരാമർശങ്ങളെ പരിഹാസരൂപേണ അവതരിപ്പിന്നത് ചരിത്ര വസ്തുതൾ മനസ്സിലാക്കാതെയാണ്. മാന്യമായ ഒരു സംവാദ ശൈലിയായിരുന്നെങ്കിൽ വസ്തു നിഷ്ഠമായി തന്നെ വിശദീകരിക്കാ‍മായിരുന്നു.

    ഇത് ഒരു തരം പകപോക്കലിന്റെ ശൈലിയായിപോയി.

    ReplyDelete
  19. പ്രിയ ചിന്തകന്‍,

    ഖുർ ആനിലെ പരാമർശങ്ങളെ പരിഹാസരൂപേണ അവതരിപ്പിന്നത് ചരിത്ര വസ്തുതൾ മനസ്സിലാക്കാതെയാണ്. മാന്യമായ ഒരു സംവാദ ശൈലിയായിരുന്നെങ്കിൽ വസ്തു നിഷ്ഠമായി തന്നെ വിശദീകരിക്കാ‍മായിരുന്നു.

    ഇത് ഒരു തരം പകപോക്കലിന്റെ ശൈലിയായിപോയി.


    താങ്കളുടെ അഭിപ്രായം മാനിക്കുന്നു.

    സംവാദത്തിനല്ല, പരിഹസിക്കാന്‍ തന്നെയാണ് ഈപോസ്റ്റ്. പരിഹാസം ഖുര്‍ ആനെ ഉദ്ദേശിച്ചല്ല്ല, പൂക്കോട്ടൂരിനെ പോലെ വര്‍ഗ്ഗീയ വിഷം ചക്കരവാക്കില്‍ പൊതിഞ്ഞ് ജനസമക്ഷം വിളമ്പാന്‍ ഈ ഇരുപത്തൊന്നാം നൂറ്റാണ്ടിലും മടികാണിക്കാത്തവരെ ഉദ്ദേശിച്ചാണ്. വര്‍ഗ്ഗീയം വിളമ്പുന്നവനു വര്‍ഗ്ഗീയം കൊണ്ടുതന്നെ മറുപടി. അത്രയേ ഉദ്ദേശിച്ചിട്ടുള്ളൂ. അല്ലാതെ ആരോട്, എന്ത് പകപോക്കല്‍ ?
    :)
    പാഠപുസ്തക വിഷയത്തിലാണു ഈ പോസ്റ്റ്. അതിന്റെ ചര്‍ച്ചകള്‍ ദാ ഇവിടെ ഉണ്ട്.

    Off:

    നിരീശ്വരനും മതവിശ്വാസിയും തമ്മില്‍ സംവാദത്തിനു ഇടമൊന്നുമില്ല - ഇരു കൂട്ടരും സ്വന്തം നിലപാട്ടുകളില്‍ ഉറച്ചു തന്നെ നില്‍ക്കുന്നിടത്തോളം. അതിനാല്‍ ആ വിഷയത്തില്‍ താങ്കളുമായി സംവദിക്കാന്‍ താല്പര്യവുമില്ല :)

    ReplyDelete
  20. സൂരജിനെ പോലെ ക്ഷമയുള്ള ഒരുമനസ്സ് കര്‍ത്തവാവേ നീയെനിക്കുതന്നില്ല.
    നൈറ്റ്ഡ്യൂട്ടിയും കഴിഞ്ഞ് കീബോര്‍ഡില്‍ കുത്തികുറിക്കാനിരുന്നാല്‍....
    കട്ടപൊക,,അതുകൊണ്ടു പലരും ചെയ്യേണ്ടപണി ആമനുഷ്യന്‍ ഒറ്റക്കുചെയ്യുന്നു.
    പാഠപുസ്തകമല്ലാതെ മറ്റെന്തെങ്കിലും വായിച്ചാല്‍,എന്താടാ..കഥപുസ്തകം വായിക്കുന്നോ..
    കലികയറുന്ന മാതാപിതാക്കടെ അരുമകളെ..വെറുതെ വിടരുത്.
    കാരണം ,ഒട്ടും വെളിച്ചം ​കയറാതിരിക്കാന്‍ തലേലൊരു തൊപ്പിയും ഫിറ്റുചെയ്തിട്ടുണ്ടല്ലോ?
    ശരിയാവില്ല ചെങായി..ശരിയാവില്ല..
    മദ്രസ്സേന്നോ..സണ്‍ഡേസ്കൂളൂന്നോ...കിട്ടുന്ന കടലസ്സുകോണ്ട്..
    ജോലികിട്ടുന്ന കാലത്തോളം ഈനാട് കൊണം പിടിക്കില്ല.
    സയന്‍സ്സ്,സാമൂഹ്യപാഠം ,എന്നിത്യാതി.സിലബസ്സില്‍നിന്നുതന്നേ.മാറ്റണം ​.

    ReplyDelete

Comments to posts older than 30 days will be moderated for spam.

There was an error in this gadget

Topics | Tags

“ഊത്ത് “ ഫോര്‍ ഈക്വാളിറ്റി (1) Art of Living (1) Biennale (1) British Library (1) cartoon (1) Kerala LAC Election 2011 (1) Life of Pi (1) Matrix the movie (1) Papez-limbus-circuit (1) saraswati (1) Tao of Physics (1) Writing Britain (1) അതിരാത്രം (1) അദ്വൈതവും ക്വാണ്ടം ഫിസിക്സും (1) അപാര്‍തൈഡ് (1) അമൃതാനന്ദമയി (1) അശ്വമേധം (1) ആണത്ത നിര്‍വചനങ്ങള്‍ (1) ആത്മാവ് (3) ആത്മീയത (4) ആമവാതം (1) ആയുര്‍വേദം (5) ആയുര്‍വേദ തത്വങ്ങളുടെ ശാസ്ത്രീയത (2) ആരോഗ്യ മേഖല (9) ആര്യന്മാര്‍ (1) ഇസ്രയേല്‍ (1) ഉണ്ടച്ചുരുട്ട് (3) ഉന്നത വിദ്യാഭ്യാസം (2) ഋഗ്വേദം (1) എം.എഫ് ഹുസൈന്‍ (1) എതിരവന്‍ (1) എൻഡോസൾഫാൻ (1) എന്തരോ (4) എളമരം കരീം (1) ഏ. അയ്യപ്പൻ (1) ഐ.എസ്.ആര്‍.ഓ (2) ഒറ്റമൂലി ചികിത്സ (3) ഓർമ്മ (1) കണ്ണുകള്‍ (1) കമലാസുരയ്യ (1) കല (2) കാളിയംബി (1) കുഴൂര്‍ (1) കൃഷ്ണന്‍ (1) കൃഷ്ണന്‍ നായര്‍ (1) കേരള നിയമസഭാ ഇലക്ഷൻ 2011 (1) ക്ലോണിംഗ് (1) ക്വംകാംബ (1) ഖുര്‍ ആനിലെ സയന്‍സ് (2) ഗീത (1) ഗോപാലകൃഷ്ണന്‍ (2) ചരിത്രം (1) ചര്‍ച്ച (1) ജനിതകം (1) ജീര്‍ണലിസം (1) ജോധ-അക്ബര്‍ (1) ടാറ്റയുടെ കാര്‍ (1) ടിബറ്റ് (1) ഡാര്‍വിന്‍ (1) ഡി.പി.ഇ.പി പാഠ്യപദ്ധതി (2) തത്വചിന്ത (1) തീട്ടം (3) തെരഞ്ഞെടുപ്പുരാഷ്ട്രീയം (3) തേന്‍ ചുമയ്ക്ക് (1) ദേവസേന (1) ദൈവത്തെ തേടുന്ന ലോജിക് (2) ദൈവവിശ്വാസം (5) നരവംശ ശാസ്ത്രം (2) നിരീശ്വരത്വം (2) നോബൽ സമ്മാനം 2010 (1) ന്യായാസനം (1) പരിണാമം (1) പരിണാമസിദ്ധാന്തം (2) പര്‍ദ്ദ (1) പാഞ്ഞാള്‍ അതിരാത്രം (2) പാഠപുസ്തക വിവാദം (1) പാപിലോമാ വൈറസ് (1) പാരമ്പര്യം (1) പാരമ്പര്യ വാദം (3) പിന്നോക്ക ജനത (1) പുരാണങ്ങളിലെ സയന്‍സ് (1) പൈങ്കിളിവിപ്ലവം (1) പൈതൃക അറിവുകള്‍ (1) പൈതൃക ഉഡായിപ്പ് (2) പൈതൃക ജാഡ (1) പ്രണയം (1) പ്രതിഭ (1) പ്രതിരോധക്കുത്തിവയ്പ് (1) പ്രപഞ്ചം (3) പ്രപഞ്ചവികാസം (2) പ്രൈമറി സ്കൂള്‍ വിദ്യാഭ്യാസം (1) പ്ലസീബോ (1) ഫലസ്തീന്‍ (1) ഫാഷിസം (1) ബൂലോകകവിത (1) ഭക്തിക്കച്ചവടം (1) ഭാരതീയ ശാസ്ത്രപാരമ്പര്യം (3) ഭാഷയിലെ ശ്ലീലാശ്ലീലങ്ങള്‍ (1) ഭാസില്‍ രമിക്കുന്നത് (1) ഭൌതിക ശാസ്ത്രം (1) ഭ്രൂണ രഹിത ഭ്രൂണ കോശം (1) ഭ്രൂണശാസ്ത്രം (1) മതം കൊണപ്പിക്കല്‍ (2) മതേതരത്വം (1) മനസ്സിലായില്ല എന്ന നിഷേധ വാക്യം (1) മനസ്സ് (3) മരുന്നു ഗവേഷണം (4) മരുന്ന് ഗവേഷണം (1) മലയാളിയുടെ ആഹാര ശീലം (1) മാതൃഭൂമി (1) മാധ്യമങ്ങളിലെ പിഴവുകള്‍ (1) മിഡില്‍ ക്ലാസ് സ്നോബറി (1) മൃഗബലി (1) മെഡിക്കല്‍ വിദ്യാഭ്യാസം (1) യുക്തിവാദം (2) രാഷ്ട്രീയം (4) ലൈംഗികത (1) വനിതാസം‌വരണ ബില്‍ (1) വര്‍ഗ്ഗീയത (2) വംശീയവിവേചനം (1) വസൂരിയുടെ ഇന്ത്യന്‍ ചരിത്രം (1) വേദാന്തം (5) വൈയക്തികം (1) വ്യവസായ വകുപ്പ് 2006-11 (1) ശാസ്ത്ര തെറ്റിദ്ധാരണകള്‍ (9) ശാസ്ത്രീയത (1) സംഘപരിവാരം (1) സരസ്വതി (1) സംവരണം (1) സംവരണ ചര്‍ച്ച (2) സംവരണവിരുദ്ധത (2) സാനിട്ടറി നാപ്കിന്‍ (1) സാമ്രാജ്യത്വം (1) സായിബാബ (1) സാരംഗി (1) സാഹിത്യം (1) സാഹിത്യനിരൂപണം (1) സാഹിത്യവാ‍രഫലം (1) സാഹിത്യവിമര്‍ശം (1) സി.ആര്‍ . നീലകണ്ഠന്‍ (1) സിനിമ (5) സിനിമയിലെ വേദാന്തം (1) സൈക്കിയാട്രി (1) സ്ഥലമെഴുത്ത് (1) സ്മാട്ട് സിറ്റി (1) സ്വാര്‍ത്ഥികളായ ജീനുക്കള്‍ (1) ഹോക്കിംഗ് (1) ഹോമിയോപ്പതി (4)